ඇත් රජුනි ඔබ එන්න

ඇත් රජුනි ඔබ එන්න 
සද්දන්ත පෙම රැගෙන
අනුරාගයට ප්‍රථම 
ඔබ දෙපා නමදින්න
අනේ මට ඉඩ දෙන්න...

සඳ රැජිණ ඔබ ඉන්න
මල් විලෙක පියා නෙත
ස්වයංවරයට ප්‍රථම
මගේ සඳ දැක ගන්න
ප්‍රියේ මට ඉඩ දෙන්න...

අකලංක මලින් පිරි 
සඳ යහන මත වැතිර
නිරිඳුනේ මම ඉඳිමි 
ඔබ නෙතින් ඉඳුල් වෙමි
මම ඔබේ රැජින වෙමි...

පුර පසින් සඳ නැගී
අවපසින් බසින තුරු
රැජිණියේ මම ඉඳිමි
ඔබ දෙසම බලා ඉමි
මම ඔබේ රජුන් වෙමි...

සියපතක් ලෙස සිතා 
ඔබ දෙපා සිප ගනිමි
මගේ දෙවිඳුන් ඔබයි 
දේව දාසියක් වෙමි
ප්‍රේමයේ වන්දනා...

රන් රුවන් කරඬුවක්
ලෙසින් ඔබ රැක ගනිමි
හදේ ලේ බිඳු රැගෙන
ලයේ පෙම් කව ලියමි
පාද පරිචාරිකා...

පද රචනය - සුජීව ප්‍රසන්න ආරච්චි
සංගීතය - ජයන්ත රත්නායක
සහාය ගායනය - උරේෂා රවිහාරි

ඔබ නැතුව ඉන්න බැරි තරමට

ඔබ නැතුව ඉන්න බැරි තරමට
ඔබ හිතට ඇවිත් හෙමි හෙමිහිට
ඔබ නොදැක ඉන්න බැරි තරමට
නෙත ඔබව සොයනවා දවසෙම

මේ සීතල හිම ගිරි අරණේ
මට හමු වූ වනපස කුසුමේ
පෙති මත සතපා රැගෙන යන්න මා
කුසුම් නිම්නයේ මාලතියේ

මේ ජීවන අවපස අහසේ
ඔබ පුරපස සඳ වී පිපුණේ
ඔබේ රැසින් මා දවාලන්න රෑ
ළය මත සනහා රාජිනියේ

පද රචනය -  සුජීව ප්‍රසන්න ආරච්චි
සංගීතය හා ගායනය - වික්ටර් රත්නායක

ඔබ වගේ කෙනෙක්

ඔබ වගේ කෙනෙක් තව ඇත්නම්
ඒ ඔබම තමයි මේ ලෝකේ
සඳ වගේ සඳක් තව ඇත්නම්
ඒ මගේ සඳයි සිත් අහසේ...

සරස සරස මම ඉන්නට ආසයි
සිරස සිරස සිප ගන්නට ආසයි...

ඔබ හිනාවකට සුදු මුතු මල් දම්
මේ ළයේ පහන් දැල්වෙන අන්දම්
ඔබ මගේ කියා මට හිතෙනව නම්
ඒතරම් සැපක් මට නෑ ආයේ...

සනස සනස සිත මම ඉන්නම්
සිහින සිහින මැද සරනව නම්...

රන් රූපෙන් ගලනා විට සඳකැන්
මේ රැයේ කොහොම ඉන්නද නොදනිම්
මා ඔබෙයි කියා ඔබ සිතනව නම්
මේ තරම් දුරස් වී ඇයි ඉන්නේ...

පැටළි පැටළි ඔබ ළඟ ඉන්නම්
නැළවි නැළවි ඔබ නළවන්නම්...

පද රචනය -  සුජීව ප්‍රසන්න ආරච්චි
සංගීතය හා ගායනය - වික්ටර් රත්නායක