වෙන් වෙන්නවදෝ

වෙන් වෙන්නවදෝ ළං වූයේ
ළං වෙන්නවදෝ වෙන් වූයේ
මං ආ මග නවතින්නම් බිඳුවක් ඇතින් ඉන්නම්
සිහිනෙන් ඔබ දැක ගන්නම් හැබැහින් ළඟටම එන්නම්...

දෙන්නා උන්නේ රන් රස සේ පෙම් අරණේ
ආදරේ තාරකා සෝ වළාවේ හැංගුනේ...

කැන්දා රන්දා රජ දහනේ පෙම් රජ දහනේ
ඈ සිතේ මා කෙරේ මෝදු වේවා ආදරේ...

පද රචනය - කේ.ඩි.කේ. ධර්මවර්ධන
සංගීතය - සරත් දසනායක

චුක්කි චුක්කි චුක්කි කියල

චුක්කි චුක්කි චුක්කි කියල මාව රවටලා 
මංජු මංජු මංජුගෙ හිත ඔයා රවටලා 
චුක්කි චුක්කි චුක්කි මමයි ඔයා හැඳින්නා 
මංජු මංජු මංජු කවුද මෙමා හැඳින්නා...

මේං මේං තුන්හිත ඔබ ගාවා ගාවා 
රාං කුරුල්ලා තුරුලට ආවා ආවා
නයන පුරා දෙහද පුරා සෙනෙහස උතුරාලා
සිකුරු දසා ලැබුව නිසා මින්දද හස පාලා...

විහින් විහින් ඔබ මට පෙම් පෑවා පෑවා
රැහැන් රැහැන් බැඳි හද තනි වූවා වූවා
සෙවන සොයා සුමලි ගියා දිවි හසරක පාවී
අඳුරු හදේ අඳුර ඉරා අරුණළු විහිදාවී...

පද රචනය - ඔගස්ටස් විනයාගරත්නම් 
සංගීතය - සරත් දසනායක 
සහාය ගායනය - ලතා වල්පොල

මුතු වරුසාවට තෙමිලා

මුතු වරුසාවට තෙමිලා
පිනි ඉහිරුණු වෙල් එළියේ
මුතු සහලින් දෝත පිරූ
මුතු මැණිකේ... මුතු මැණිකේ...

වතක මහිම නා දළු තොල් පෙති පිටය
කෙතක මහිම රන් කරළක මුතු ඇටය
පිනක මහිම පිං වපරැ'ති නෙත් කැටය
මැණික මගේ මුතු මැණිකේ හිමි මටය...

එළිය කරයි සඳ නැඟ වෙල ළඟ දෙනිය
බඹරු උරනවලු මී වද වල පැණිය
සිතක සතුට වක්කඩ කැඩුවා වැනිය
ඇයට බාර දෙනවාමයි මගෙ තනිය...

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

පෙම් ලොව දොරකඩ හැපෙමින්

පෙම් ලොව දොරකඩ හැපෙමින් හඬා වැටෙන්නේ
කියන්න ඔබ මන්ද හඬන්නේ
බිඳුණු පෙමට දැවුණු හදින් හඬා වැටෙන්නේ
හඬන්නවත් කඳුළු නො එන්නේ...

නොදන්නී ද බොළඳියෙ නුඹ පෙම් ලොව රුදුරු
නෑසුවේ ද පෙම් ලොව ගැන තොරතුරු කුරිරු
ඇසුවෙමි පෙර කව් නළු වල පෙම් ලොව රුසිරු
එවන් රුසිරු සොයා ආමි බිඳ හැර පවුරු...

කඳුළින් තොර පෙම් පුවතක් ඇසුවෙද මියුරු
නොපෑරුණු සිතින් උන්නේ පෙම් ලොව කවුරු
දනිමි හැඳින්නෙමි පෙම් ලොව මා ප්‍රිය මිතුරු
පවසට කඳුළැලි බොන්නම් යදියක අයුරු...

පද රචනය - සුනිල් ආරියරත්න
සංගීතය හා ගායනය - වික්ටර් රත්නායක
සහාය ගායනය - නිර්මලා රණතුංග

තොටුපළ අයිනේ

තොටුපළ අයිනේ
කවුද අත වනන්නේ
කවුද අත වනන්නේ
තොටුපළ අයිනේ...

හැන්දෑ වරුවේ ඉවුරේ වැටකේ උණ පඳුරේ හෙවණේ
හබල බිඳීලා පෙරළුණු ඔරුවක සුන්බුන් නෙත දැවටේ
ඒ දෙස නොබලමි ඒ දෙස නොබලමි
තොටුපළ අයිනේ කවුද අත වනන්නේ...

ආ මඟ අඳුරේ පෙරමඟ දෙගොඩින් තරු යුවළක් ඇවිලේ
ඔරුකඳ ඇතුළේ නුපුරුදු සුවඳත් දියමංකඩ විසිරේ
හෙට මම හිනැහෙමි හෙට මම හිනැහෙමි
තොටුපළ අයිනේ කවුද අත වනන්නේ...

පද රචනය - සුනිල් ආරියරත්න
සංගීතය හා ගායනය - වික්ටර් රත්නායක

හෝපලු වනපෙත

හෝපළු වනපෙත කම්පිත කරවන
මන්මද නර්තන රංගන කළ මැන...

ලැම විල පියකරු හසුන් රකින්නී
සිහිනිඟ සුවිපුල් උකුල් දරන්නී
මන්මද නර්තන රංගන කළ මැන...

අංජන ගල්වන පංකජ නයණී
වෙණ චංචල කළ සත්සර දියණී
මන්මද නර්තන රංගන කළ මැන...

පද රචනය - කේ.ඩී.කේ ධර්මවර්ධන

සංගීතය හා ගායනය - වික්ටර් රත්නායක

රෑ බෝ වී එන

රෑ බෝ වී එන හැන්දෑයාමේ
රතු වී මුහුදට හිරු වැටුණා
ඒ මොහොතේ මට ගිනි ගත් නගරෙක
අප දෙදෙනා උන් හැටි දැනුණා...

ඔබ එක අතකින් මා එක අතකින්
අවුදින් ඉස්සර මුණ ගැසුණේ
මේ ඉර අහසින් වැටෙන වෙලාවක්
සොයමිනි අප දෙදෙනා සිටියේ...

තරු වලටත් ඉඩ වැස්සකටත් ඉඩ
අද ඇත ඕනෑ තරම් ඔහේ
ඔහු අත ගත් ඔබ ඇය අත ගත් මා
ළඟ ඒ ඉඩ නෑ කොහෙත් ලොවේ...

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

අනාථනාථයා‍ණනි

අනාථනාථයා‍ණනි
තුන්ලෝ තල තිලකාය මාන වූ
ශ්‍යාක්‍ය සිංහ වූ
අනාථනාථයාණනි...

මුවින් සිනහ සී සිතින් වෛර කරනා
සිරුර වැළඳ ගෙල සිර කොට හිස සිඳිනා
බුදු බණ නෑසු රුදු මිනිසුන් දැක
පඬුපුල් සෙලසුන් උණු නොම වෙද අද...

දෙතොල හලා හල විෂ තැන තැන ඉසිනා
ප්‍රේමය සාමය පාගා බිඳ දමනා
නොමිනිස් කැළ නම් යහ මඟ නොදකිත්
සිවු වෙනි වරටත් බුදු හිමි වැඩියත්...

පද රචනය - සුනිල් ආරියරත්න
සංගීතය හා ගායනය - වික්ටර් රත්නායක

අකුරු කරන්නට පොඩි

අකුරු කරන්නට පොඩි සන්ධියෙ බාලේ
මතකයි මවුපියන් නුඹ මට දුන් තාලේ
දෙපතුල වැටී දෑතින් වැඳ ඒ කාලේ
දුන් දුංකොල බුලත් වේලුනි මැද සාලේ....

පාඩම් කියා දී හඬ ගා උගුර තලා
රජ පෙරහැරට නූඹ ඇන්නන් එකතු කලා
වේවැල් කෝටු නාරං අතු ඉවත හෙලා
මම එතැනමය හිමි ගුරු නිවසටම වෙලා....

නුඹලෑ නමින් කැප කොට හොඳ කල වයස
කොපමණ රජුන් හැදුවද ගණිමු ද කෙලෙස
නොහැ‍ඟෙන ලෙසින් පෑදූ බව සිය නැණස
පසු කර පිය මනිති දරුවෝ ගුරු නිවස....

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

මා තනි කුටියේ

මා තනි කුටියේ මගේම මනසේ
ඇගේ සුවඳ බිඳු තවරා ඈතක
නො එනා ගමන් ගියා දෝ
සුළං රොදේ
සුළං රොදේ

ළමා වියේ සිට ළසෝ තැවුල් විඳ
දුක් ගිනි පීඩා හිසින් දරාගෙන
සිතේ වියෝ ගිනි කතරක් වූ සඳ
ඔබත් නොයනු මැන මා හැරදා
සුළං රොදේ
සුළං රොදේ

ඇගේ මගේ දුක් ප්‍රේම විරහ ගී
අනන්තයේ කඳු අතරේ සඟවා
මගෙන් වියෝවූ ඇගේ ලෝකයට
ඔබත් නොයනු මැන මා හැරදා
සුළං රොදේ
සුළං රොදේ

පද රචනය - උපාලි ධනවලවිතාන
සංගීතය  - සරත් දසනායක

කණ කැස්බෑ නෙත

කණ කැස්බෑ නෙත බලා හිඳිනවා
අහස දකින්නට විය සිදුරෙන්
පෙරුම් පුරාගෙන අහස බැලූ දා
සඳ නැත අහසේ අමාවකයි

පියන් වසාලා අගුළු දමා තිබු
දිවි මැදුරේ කවුළුවක් ඇරී
සඳකැන් සිහිලස ගලා හැලෙන තුරු
බලා උනිමි එය තවත් නැතී

තනිකම ඝනඳුර නොනිමෙන කෙඳුරුම
යළි රජයන්නට වරම් ලැබී
සුපුරුදු උරුමයෙ සුළඟ වැදී යළි
කවුළුව වැසුණා අගුළු වැටී

පද රචනය - කේ.ඩී.කේ ධර්මවර්ධන
සංගීතය හා ගායනය - වික්ටර් රත්නායක

ඒ දණ්‍‍ඬෙන් පිය මනිනු එපා

ඒ දණ්‍‍ඬෙන් පිය මනිනු එපා
ගඟ අද හරිම සැරයි
තැන තැන ඇති ඵල බුදිනු එපා
අද මුළු ගමම විසයි..

විපතක් වූවොත් කාට කියන්නද
මා තනිවෙනවාමයි
තවම බහ නොදුන් ඔබ නැතිදා මම
ගම හැරදා යනවාමයි
අනුකම්පාවෙනි කියන්නෙ ‍මිහිරියෙ...

දෙදෙනා ඉන්නේ දෙගම්මානයේ
ගඟ ඒ මැදින් ඇදේ
පාලම හදලා ඉවර වෙන තුරා
දෙදෙනා බැ‍ඳෙනු ඇතේ
ඔරුවක් මට ඇත ඔබ ගෙන යන්නට...

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

ආදර ගඟුලෙහි ඉවුරෙ රැඳී

ආදර ගඟුලෙහි ඉවුරෙ රැඳී සහන පවන් සැලූ
මා ළඟ ඔබ සිටිනා විටදී ලොවම දැකුම්කලු...

මල් වැල් වන විල් පිරී ගියේ සෙවණ දෙවන්නලු
බිඳු නඳ විහඟුන් ඉගිල්ලුනේ මිහිරෙ රැඳෙන්නලු
පුන් සඳ නැගුනෙත් අහස් තලේ අපට බලන්නලු
දෙනෙතට කඳුලැලි තුරුල් කලේ පෙමට අඬන්නලු...

මී වද මී පැණි පිරී ගියේ දෙතොලෙ රඳන්නලු
දේදුනු ඕවිලි මැවී ගියේ ලොවම පිනන්නලු
මේ ලොව මා ඉපදුනේ ප්‍රියේ ඔබව ලබන්නලු
ඒ හැර ලැබුණත් පලක් නැතේ ඉසුරු මැණික් මලු...

පද රචනය - ප්‍රේමකීර්ති ද අල්විස්
සංගීතය - වික්ටර් රත්නායක
සහාය ගායනය -  ශ්‍රීමතී තිලකරත්න

කොතැනද අද ඔබ ඉන්නේ

කොතැනද අද ඔබ ඉන්නේ
පිණි මුතුලැල් කඩා හැලී
සීතල සඳ පිපුණු රැයක
ආදරයෙන් උමතු වී බැඳී
මා ඇකයෙහි සැතපුන සොඳුරි
කොතැනද අද ඔබ ඉන්නේ...

අතීතයේ එක් දිනකුදු
නොදැක සිටින්නට නොහැකිව
අනන්ත රැකවල් මැද වුව
නිඹඳ මවෙත ළං වූ
අහිංසකාවියේ...
කොතැනද අද ඔබ ඉන්නේ...

දිවි ඇති තුරු එක සෙවණක
සැනසෙන්නට පෙරුම් පිරූ
පෙර අප හද වූ සෙනෙහස
කොතැනක සැඟවුනිදෝ
නිසංසලාවියේ...
කොතැනද අද ඔබ ඉන්නේ...

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

ඇගේ නමට

ඇගේ නමට හිමිකම් පවරා දුන්
මගේ ජීවිතය නම් දිනපොත ගෙන
පෙරලා බැලුවෙමි එහි පිය සටහන්
යුග ගණනක් දුර මතකය විහිදා....

නිකිණි මහේ තිස් එක් වැනි රිවි දින
ඇය හමු වූ බව මම ම ලියා ඇත
රෝස මලක් ගුරු පාරේ දුටුවෙමි
නෙළා ගන්න එය දවසක රිසිවෙමි....

ඉල් මාසේ තිස් එක් වැනි සඳු දින
මිහිරි සොඳුරුබර සැඳෑ වෙලාවක
මා හා එන බව ඇගෙ අත් අකුරින්
පිටක් පිරෙන්නට ලියා තබා ඇත....

උඳුවප් මාසේ කිසියම් දවසක
බොඳ වූ පොඩි වූ පිටුවක් හමුවෙයි
ඇය දීගෙක ගිය වග මා අතහැර
කවුරු නමුත් ලියලා ඇත ලොකුවට

ඉන්පසු පසු පෙරළෙන හිස් පිටු ගණනකි
තවමත් එහි මම කිසිවක් නොලියමි...
තවමත් එහි මම කිසිවක් නොලියමි...
තවමත් එහි මම කිසිවක් නොලියමි...
තවමත් එහි මම.....

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

පායන සඳ ගැන

පායන සඳ ගැන මොනව හිතන්නද
හිතුවත් ඒ ගැන මොනව කියන්නද
කිව්වත් කිසිවෙකු අහන්නේ නෑ
එයද ආදරය වාගේ​...

සිතක සිතුම් එක්තැන් කොට අමුණා
ආදරයේ මහ පොතක් ලියුවෙමි
මේ ලොව නෙතු දස දහසක් ඇති මුත්
කිසිම නෙතක් ඒ දෙස හෙළුවේ නෑ​...​

ගීපොතකින් මා උපුටා නොගතිම්
මගේම සිතුමන් රසයෙන් එක්කොට
මා හැමදාමත් හඬගා කියනෙම්
ආදරයේ.. මහ පොතක් ලියු බව​...​​

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

පුලා සුවඳ මලවුල් කැරැ

පුලා සුවඳ මලවුල් කැරැ වරල් බැඳ
දුලා රන් පතින් සරසා සවන් සොඳ 
නිලා දිගු නුවන් රසඳුන් තනා ඇඳ
බලා සිටු රඟන රඟ මඬලැ කල්බඳ

විදෙන ලෙළෙන නරු බර පුළුලුකුළැ රැඳී
හෙළන නඟන අත නුවනග බැලුම් දිදී
රුවින දිලෙන අබරණ කැලුම ගත යෙදී
සැලෙන පහන සිළු වැනි රඟන ලිය සැදී

ලකළ පුළුලුකුළ බඳ මිණි මෙවුල්ලා
සමඟ රන් සලඹ රැවු දී වෙවුල්ලා
වයන පදට තබමින් පද කමල්ලා
රඟන ළඳුන් බල රූසිරු සියල්ලා

 -සැළලිහිණි සංදේශය

දිනෙක හිරු බැස යන වෙලාවක

දිනෙක හිරු බැස යන වෙලාවක
සයුරු වෙරළක හුදකලාවෙක
කල්පනාවේ සිටිය මොහොතක
මතක් විය සිතුවිලි අතීතෙක..

සයුර මා විය අහස ‍ඔබ විය
දෙදෙන ළං වූ ක්ෂිතිජයක් විය
ඒ වෙලාවේ මට මතක් විය
කලක් ලොව අප ගැන සිතූ හැටි..

සයුර මා විය අහස ‍ඔබ විය
දෙනෙත රැවටූ ක්ෂිතිජයක් විය
කී කථා‍වේ අරුත වැටහිණ
අහස සමුදුර එකතු වී යැයි..

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

අකල්හී පියාපත්

අකල්හී පියාපත් බිඳී ගිය කුරුල්ලෙකු
ගයන ගී අහන්නට ආවෙහිද කිව මැනව
එකල්හී පියාපත් සවිමත් ව තුබූ සඳ
ඔබේ ලඟ අද වගේ මම උනිමි නොපෙනුනිද...

මානයෙන් නෙත් බිඳුනු ස්නේහයෙන් සිත මිදුණු
සරුංගල් ලෝකයේ එදා ඔබ නොදත්තෙමි
ප්‍රේමයෙන් හද පිරී ස්නේහයෙන් සිත බැඳී
ඔබේ හෙවණැල්ල සේ ඔබ ලඟම මම උනිමි...

සරුංගල් සිහින ලඟ ජීවිතය හේම වී
මට මගේ හෙවණෑල්ල පවා අද නැත ලඳුනි
නොතැවෙන්න පිය සබඳ විකල් වූ සිත නිවමි
ඔබේ හෙවණැල්ල වී සදා ඔබ ලඟ ඉඳිමි...

පද රචනය - මහින්ද අල්ගම
සංගීතය - රෝහණ වීරසිංහ
සහාය ගායනය - නිරංජලා සරෝජිනී

ඇත් රජුනි ඔබ එන්න

ඇත් රජුනි ඔබ එන්න 
සද්දන්ත පෙම රැගෙන
අනුරාගයට ප්‍රථම 
ඔබ දෙපා නමදින්න
අනේ මට ඉඩ දෙන්න...

සඳ රැජිණ ඔබ ඉන්න
මල් විලෙක පියා නෙත
ස්වයංවරයට ප්‍රථම
මගේ සඳ දැක ගන්න
ප්‍රියේ මට ඉඩ දෙන්න...

අකලංක මලින් පිරි 
සඳ යහන මත වැතිර
නිරිඳුනේ මම ඉඳිමි 
ඔබ නෙතින් ඉඳුල් වෙමි
මම ඔබේ රැජින වෙමි...

පුර පසින් සඳ නැගී
අවපසින් බසින තුරු
රැජිණියේ මම ඉඳිමි
ඔබ දෙසම බලා ඉමි
මම ඔබේ රජුන් වෙමි...

සියපතක් ලෙස සිතා 
ඔබ දෙපා සිප ගනිමි
මගේ දෙවිඳුන් ඔබයි 
දේව දාසියක් වෙමි
ප්‍රේමයේ වන්දනා...

රන් රුවන් කරඬුවක්
ලෙසින් ඔබ රැක ගනිමි
හදේ ලේ බිඳු රැගෙන
ලයේ පෙම් කව ලියමි
පාද පරිචාරිකා...

පද රචනය - සුජීව ප්‍රසන්න ආරච්චි
සංගීතය - ජයන්ත රත්නායක
සහාය ගායනය - උරේෂා රවිහාරි

ඇහුම්කම් දෙන්න නම් එපා

ඇහුම්කම් දෙන්න නම් එපා
අඩ සඳ නුඹත්, මා ඇයට මුමුණනා පෙම් කතා
ඇගෙ උණුසුමට මා මත් වෙලා
සුන්දර වූ මේ රැයේ තනි වෙලා...

මලානික වලාපෙල ඇදි ඇදී යයි දුරින්
නිරාවරණය කරයි මුලු ලෝකෙම අප කෙරෙන්
මගේ කොපුලක ඇගේ, අකීකරු කෙහෙ රැළක්
දැවටෙනා හැටි බලන්...

සරාගික නුරා ඇස යොමාගෙන ඇයි හොරෙන්
අපේ ලෝකයම දැන් වලා රොදත සඟවපන්
ඇසේ මිණීකැට ඇගේ උමතු වී ප්‍රේමයෙන්
දිළිසෙනා හැටි බලන්...

පද රචනය - ගීතනාත් කුඩලිගම
සංගීතය සහ ගායනය - වික්ටර් රත්නායක

සොඳුරිය ඔබගේ

සොඳුරිය ඔබගේ වුවන මලක් නම්
නිශා කලෙහි ඔබ සෙවු බඹරිඳු මා

සොඳුරිය ඔබගේ වුවන සඳක් නම්
දිවා කලෙහි පුල් කුමුදු මලෙකි මා
සොඳුරිය ඔබගේ වුවන මලක් නම්
නිශා කලෙහි ඔබ සෙවු බඹරිඳු මා

සොඳුරිය ඔබගේ වුවන මිණක් නම්
යොමා බැලුවෙ අහසේ තරු දෙස මා
සොඳුරිය ඔබගේ වියොව දුකක් නම්
සදා දෙනෙත් කඳුළින් සදනුද මා

පද රචනය - දයානන්ද ගුණවර්ධන
සංගීතය - ලයනල් අල්ගම

මගේ ගෙටත් උඩ ඔබේ ගෙටත් උඩ

මගේ ගෙටත් උඩ ඔබේ ගෙටත් උඩ
කැලුම් දිදුලවන සරා සුපුන් සඳ
එක වහළක් යට එකට දකින්නට
පූරුවෙ කල පින් මහිම කියන්නට
ප්‍රියේ නුඹම උපනූපන් ජාති හමුවේවා...

කපුරු ගොඩක් සේ අළුවත් නොරැඳී
පැතූ පතුම් පෙල දැවී ගියාවූ
ජීවිතයට ඔබ අලුතින් එක්වී
මා ජීවත් කර සතුට ගෙනාවූ
ප්‍රියේ නුඹම උපනූපන් ජාති හමුවේවා....

කිළිටි මගේ අත ඔබට සුදූසු නැත
එබැවින් වෙනතක බැඳුනද කම් නැත
එනමුඳු මෙලොවේ නැවත උපන් කළ
අත් භවයෙන් එළිය දකින්නට
ප්‍රියේ නුඹම උපනූපන් ජාති හමුවේවා...

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

බින්දුමතී.

බින්දුමතී.....
බින්දුමතී.....
මා ආදර පේමාදර බින්දුමතී
පෙමා වඩන ළද බින්දුමතී....

කලු උක් ගස විලසා කලු කලු නංගීයේ
දර කඩලා ඉහ තියලා කොහේද ගියේ
ගොම්මං සමයමටා ගම හොල්මං තියේ
නුඹ එක්කා මා එන්නා යමු නංගීයේ...

ළිඳ ළඟටා යන්න එපා දියබරියා කයි
වැට ළඟටා යන්න එපා කබරගොයා එයි
ගඟ ළඟටා යන්න එපා අවි මානා එවි
පිට ගමටා යන්න එපා අපි මෙහි තනි වෙයි...

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

සාගර ජලය මදි

සාගර ජලය මදි හිමි ගුණ ලියන්නට
අහසේ තාරුකා මදි ගුණ ගයන්නට
පොළවේ වැලි වලින් බැහැ ගුණ මනින්නට
හඳටත් ඉරටවත් බැහැ ගුණ කියන්නට..

සුළඟට බැරිය අපමණ ගුණ බෙදන්නට
හඬකට බැරිය නිම නැති ගුණ ගයන්නට
පසතුරු නදටවත් බැහැ ගුණ වයන්නට
දෙසවණ මදි හිමි වරුණය අසන්නට..

දොලකට බැරිය හිමි සිරිපද දොවන්නට
පින්නට බැරිය හිමි සිරිපද තෙමන්නට
මිනිසත් බවය ලත් මට බැරි ලබන්නට
මල කල පින කවර ඔබ ළඟ මියෙන්නට..

පද රචනය - ප්‍රේමකීර්ති ද අල්විස්

සංගීතය හා ගායනය - වික්ටර් රත්නායක

ඈගේ පහසින්

ඈගේ පහසින් මත් වූ සුව‍ඳේ පැටලී පාවී හද පියඹා
මේ රෑ ඉවසුම් නොදේ කැළඹිලා...

මී විත මා මුව යා වෙලා
රෑ අඳුරේ මුළුගැන්විලා
ඈ ඇසුරේ හද නිවුනා
රහසින් රහසේ පාවෙලා...

ඒ නෙත ඒ සිත මා සොයා
මා සනසා මන් මත් කලා
ඒ මොහොකේ හිතට හොරා
දෑසින් කඳුළැල් වෑහුනා...

පද රචනය - ප්‍රේමකීර්ති ද අල්විස්
සංගීතය - ස්ටැන්ලි පීරිස්

පාවේ වලා

පාවේ වලා
ඈත කඳු බලා
පෑ ආදරේ අමා
මා හද මවා
මා හද මවා...

කඳුලැල්ලෙන් හසරැල්ලෙන් සිහින මැවෙනවා
ජීවිතයේ මිහිරි සුවේ මහද නැගෙනවා
ආලෝකෙ විහිදා සංකා නැසේ සුසුම් රැල් මැකේ
නුවන් දිය සිඳේ පහන් පෙම දිලේ...

හාදව පෙම් බැන්ද රුවින් පාළුව මැකුනා
ආදර ලොව අන්ධ නොවේ දෙහදක නැඟෙනා
දෑසේ මැවේ ආදරේ මල් හිනා තුටින් පිරි ලොවේ
සහන් එලි නැගේ පහන් පෙම දිලේ...

පද රචනය - මීගොඩ විල්සන්

තනු නිර්මාණය - මර්වින් පෙරේරා

මල්සර උක්දඬු දුන්නෙන් පැණි බී

මල්සර උක්දඬු දුන්නෙන් පැණි බී
දේදුන්නක් උඩු අතට නවා බිඳ
මල් උයනක මල් අවුල්කර දමා
ඔබේ පැල්පතට ඔබ දැක ගන්නට
ආවෙමි වියරු වැටී...

ඔබ හඬනා හඬ මට ඇසුණේ නැත
ඔබ හිනැහෙන හඬ මට ඇසුණේ නැත
ඔබ නිහඬ ව සිටිනා හඬ පමණක්
සවන් යොමා සිටි මට ඇසුණා
ඔබේ නිහඬ බව මා සිත කලඹයි...

හිනැහෙනු මැන හසරැල් අතුරා වත
හඬනු මැනවි නැතිනම් පොඟවා නෙත
ඔබ නිහඬ ව සිටිනා විට මගෙ සිත
මුළු ලොව හැඬුවත් දෙසවන නොමදෙත
ඔබේ නිහඬ බව මා සිත කලඹයි...

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

දෛවයෝගයකින් නොවේදෝ

දෛවයෝගයකින් නොවේදෝ
හමුවුණේ අප හමු වුණේ
දෛවයේ සරදම් ලබන්නට
කිම මෙසේ අප හමුවුනේ...

ඇදුරුතුමියයි ප්‍රේමයේ ඔබ
ඇදුරුතුමියයි යෞවනේ
ශෝකයේ රුදු වේදනාවේ
කඳුළු සයුරේ උල්පතයි...

නඳුන් උයනයි ස්නේහයේ ඔබ
සඳුන් සිළිලයි ජීවිතේ
සොම්නසේ ආනන්දයේ
හසරැල් තරංගේ උල්පතයි...

පද රචනය - සුනිල් ආරියරත්න
සංගීතය හා ගායනය - වික්ටර් රත්නායක

කතරට කුමටද වසන්තයක්

කතරට කුමටද වසන්තයක්
සයුරට කුමටද අනන්තයක්
ඔබ පිලිබඳ සිත මගෙ තනියට ඇත
මට කුමටද වෙන සිතක් කයක්...

දුහුවිලි සුලි සුලි නැගෙයි බි‍ඳෙයි
දිය ඇලි දිය ‍රැලි ඇදෙයි ‍රැ‍ඳෙයි
මතකය ලුහුබැඳ ඔබ වෙත එන සඳ
ජීවිතයම මගෙ ඔබෙයි ඔබෙයි...

සඳ ‍රැස පිණිදිය ‍රැලෙහි ඔතා
පලඳමි ගෙලවට මලක් ගොතා
ඔබ නැති මිහිමත මගෙ පණනළ නැත
දෙදෙනෙකු මුත් අප එකයි එකයි...

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

හිමි කාරි ඔබයි මගෙ ජීවිතයේ

හිමි කාරි ඔබයි මගෙ ජීවිතයේ
ජීවිතය මට නොදුන්නූ
හිමි කාරි ඔබයි මගෙ ජීවිතයේ
ආදරය මට නොදුන්නූ..

හිත හඬා වැටෙන දුක්බර මොහොතේ
සඳ පිපී සැඟවිලා ගියෙ කොතැනේ
ඔබ මගෙන් ඈත් වී ගිය මොහොතේ
දුක දරාගන්න හැකි වෙද කෙලෙසේ..

තරු කඩා වැටුනු කළුවර අහසේ
ඔබ තනි තරුවයි පිපි හද මඬලේ
මල් පිපී පරව ගිය මල් උයනේ
ඔබ සුවඳ මලයි මගේ හද උයනේ..

පද රචනය - බුද්ධදාස ගලප්පත්ති
සංගීතය හා ගායනය - වික්ටර් රත්නායක

අලුත් දවසක

අලුත් දවසක අලුත් වෙරළක
අලුත් ගීතය ඇසේවී
අලුත් අරුතක් දැනේවී
අලුත් හෙවණක අලුත් යහනක
අලුත් හීනය බි‍‍ඳේවී
අලුත් මිහිරක් දැනේවී..

පිපෙන මලකින් සුවඳඅරගෙන
හමා යද්දී මාරුතේ
උදම් නොවෙමින් තුරෙහි හිනැහෙන
එමල පහදයි ජිවිතේ..

හෙලන සුසුමක රැඳුනු දුක දැක
සසල වෙයි ගහ කොල පවා
එවන් සුසුමක් උපන් හදවත
සසල නැති හැටි රෑ දිවා..

සංගීතය හා ගායනය - වික්ටර් රත්නායක

සිනා දොළක් වන් සිනාමලී

සිනා දොළක් වන් සිනාමලී
මල්වර නැකතින් දොරට වඩින සුදු සිනාමලී
බලා උන්නෙ එනතුරු පෙර වාගේ
ඇයි පිට පාරෙම අද...

පෙරට වඩා අද හැඩකාරයි
ආඩම්බර පාටයි
නාඳුනන ලෙස කෝල බැලුම් නෙත
නොදැක හිටිය ටික දවසට වෙනස් වුණාදෝ
ඇයි සිනා නැතුව අද...

වදුලු පුරා දං හිඹුටු සොයා
කෙළිදෙළෙන් නිදැල්ලේ
දුව පැන හිනැහුණු පුංචි කිරිල්ලිය
නුඹේ ළපටි සිත දෙගුරුන් අවුල් කළාදෝ
ඇයි කතා නැතුව අද...

පද රචනය -  කුලරත්න ආරියවංශ
සංගීතය හා ගායනය - වික්ටර් රත්නායක

යළි නො එනා ගමනක් දෝ

යළි නො එනා ගමනක් දෝ
නිම නොවෙනා ගමනක් දෝ

ළීණි අයින පාර කියන්නේ
මාළු අයින පෙරළි කරන්නේ
මූදේ කසු කුසුව ඇසෙන්නේ
දෑත දෙපා කඳුළු සලන්නේ

යොතේ තිඹිරි සුවඳ දැනෙන්නේ
පැලේ සුවඳ සුළඟ ගෙනෙන්නේ
දියඹේ අප තනිව ඉඳින්නේ
වෙරළේමයි හිත ගැවසෙන්නේ

පද රචනය - සුනිල් ආරියරත්න
සංගීතය හා ගායනය - වික්ටර් රත්නායක

කඳුළු පැන්

කඳුළු පැන් - කඳුළු පැන් කෙණ්ඩියක්
සිනහා මල් - සිනහා මල් වට්ටියක්
දෑතට ගෙන යා හැකි දුර ගවු සියයක් වත් වේ නම්
ප්‍රේම වන්තයෙක් වුනාට කමක් නෑ මලේ...

සුසුම් වැල් - සුසුම් වැල් ඔලගුවක්
පැතුම් මල් - පැතුම් මල් පළිඟුවක්
දෑතට ගෙන යා හැකි දුර ගවු සියයක් වත් වේ නම්
ප්‍රේම වන්තයෙක් වුනාට කමක් නෑ මලේ...

උණු කඳුළු - උණු කඳුළු බත් මුලක්
මල් පැදුරු - මල් පැදුරු පන් මිටක්
දෑතට ගෙන යා හැකි දුර ගවු සියයක් වත් වේ නම්
ප්‍රේම වන්තියෙක් වුනාට කමක් නෑ නගේ...

පද රචනය - රඹුක්කන සිද්ධාර්ධ හිමි
සංගීතය හා ගායනය - වික්ටර් රත්නායක

කඩුපුල් තලා

කඩුපුල් තලා
කඳුළින් දොවා
රහසේම ඈ
වෙන්වී ගියා..

දෙගුරුන් වරම් ලබා
ඔහු හා බැඳී
සැරදේ සදා
මට ඒ ඇතී..

පෙළුනොත් නුවන් තෙමී
යම් දාක දී
පවසන් ළ‍ඳේ
සැනෙකින් එමී..

පද රචනය -  කුලරත්න ආරියවංශ
සංගීතය -  ස්ටැන්ලි පීරිස්

සමුගන්නට අවසරයි

සමුගන්නට අවසරයි
අවසරයි අවසරයි
මගේ හිත මට දෙන්නකෝ
ඔබෙ හිත අරගන්න අවසරයි

තව ළඳකට මේ හිත පුද දෙන්න - අවසරයි
අත් හැර ඔබෙ අත් ඇගෙ අත ගන්න අවසරයි - අවසරයි
ඒ ලොව හිඳ මා හිත රිදවන්න අවසරයි....
ලස්සන යුග දිවි පෙවෙතක යන්න අවසරයි - අවසරයි අවසරයි

පෙම් ලොව විසිතුරු ඇය හා විඳිමි - අවසරයි
රන් සමනල ලෝකයකට යන්න අවසරයි - අවසරයි
තුන් හිතකින්වත් ඔබ නොපෙනෙන්න අවසරයි - අවසරයි
මග වැරදුණු දා මා වෙත එන්න අවසරයි....

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක
යුග ගායනය - නිරංජලා සරෝජිනී

රිය පෙරහැරකින් මංඟල ගමනින්

රිය පෙරහැරකින් මංඟල ගමනින්
පිටගම් ගිය ළඳුනේ
තාමත් ඔබ ප්‍රිය මනාප හදවත
සිහිනෙන් වත් අමනාප නොවේ...

ඕවිට අද්දර බෑවුම් කන්දේ
ළඳු අයිනේ තිබු පුංචි පැලේ
ඒ මල පිපුනේ මටම නොවේදෝ
දොවියනි ඇයි ඔබ සාප කලේ...

ළිහිණි ගිරා කැළ සිංදු අහන්නට
පෙරසේ එනවා කන්ද දිගේ
ගම හැර ගිය දා හෙලූ කඳුළු දැක
තාමත් සඳ නෑ ගමට මගේ...

පද රචනය - උපාලි ධනවලවිතාන
සංගීතය  - සරත් දසනායක

කදුළු මල් පිපුන දා

කදුළු මල් පිපුන දා
හදවතින් ගලා ආ
සෙනෙහසින් වියරු වූ
ජිවිතය නැවතිලා...

කලක් පපුවේ රැදී
ආත්මය උමතු වී
නිමක් නැති ප්‍රේමයේ
සොහොන් කොත පාමුලේ
පරාජිත වී හැඩූ...

වෛරයක්න නෑ හිතේ
ආදරේ නාමයෙන්
මතුව ඉපැදෙන භවේ
මෙහෙම දුක් නොවේවා
නිවන් දකිනා තුරා...

පද රචනය - ශාන්ත දේශබන්දු
සංගීතය - ඩී.ඩී. ගුණසේන

වක්කඩ ළඟ බැද්ද ඉමේ

වක්කඩ ළඟ බැද්ද ඉමේ ඉද්ද ගැසී බලා හිඳී
ගමේ ගැටවු නුඹ යන මඟ කඩ පිළ ළඟ බලා හිඳී
කට කොනකින් වත් එපා හිනා නගන්න
නෙත කොනකින් වත් එපා බැලුම් හෙලන්න...

මල්ගෝමර සිහින් බඳේ සුළඟ දකී ටිකිරි නගේ
මුතු දත් පෙල පුරා නටන කොමළ හිනා බිංදු බිංදු
අනේ කොහෙද නුඹේ රුවට මං දැක නැහැ ගමේ ළන්දු

වත පියුමේ රුවට ළඳේ හඳපානත් වියරු වැටේ
ගොම්මන් කළුවර යාමේ තනි මඟ නොම යන් නිරතුරු
ඔය ලස්සන වසා ගනිං දීගෙක යන දා එන තුරු

පද රචනය - උපාලි ධනවලවිතාන
සංගීතය  - සරත් දසනායක

හුරතලේට කවි කියමින්

හුරතලේට කවි කියමින් එහෙ මෙහෙ ගිය මං
බාල බොළඳ බස් දොඩමින් කැලේ පැන්න මං
බාල වියෙන් පිටමං වී යොවුන් වියට පියමැන්නේ
පිය ළඳුනේ නුඹ නිසාය...

කැදලි පුරා කුරුළු පුරේ ආල හැඟුම් මැවෙනු දුටිමි
කැලේ පුරා ලතා ලපලු තුරුවැල් පෙම් කෙළිනු දුටිමි
එවන් දසුන් මා දුටුවේ
පිය ළඳුනේ නුඹ නිසාය...

උනුන් හඹාදුවන පනින සමණළ පෙම්වතුන් දුටිමි
රැලෙන් වෙන්ව පීනායන ආදරවන්තයින් දුටිමි
එවන් දසුන් මා දුටුවේ
පිය ළඳුනේ නුඹ නිසාය...

පද රචනය - සුනිල් ආරියරත්න
සංගීතය හා ගායනය - වික්ටර් රත්නායක

නුරා රොන් බරින්

නුරා රොන් බරින් පියවුන
ඇගේ සොඳුරු ඉඳුවර ඇස්
ලොවේ කාටවත් කවරදාකවත්
මිහිරි නොවේවා...

මහද සේ සැලී පොපියන
ඈ දොතොල් නුරා උල්පත
ලොවේ අනෙකෙකුට කිසිදා
මිහිරි නොවේවා...

ජීවිතේ නිවා සනහන
ඈ සෙනේ දයා දියපොද
ලොවේ අනෙකෙකුට කිසිදා
සිහිල් නොවේවා...

පද රචනය - ජගත් ගාමිණී මාවතගම
සංගීතය හා ගායනය - වික්ටර් රත්නායක

මියුරු කල්පනා

මියුරු කල්පනා නෙතක දැල් වුනා
අමයුරු රස හසකැන් මැද සිතක් හිනැහුනා
වරෙක නැලැවුනා වරෙක ලතැවුනා
නුපුරුදු ගිණි දහසක් මැද සිතක් මැලැවුනා....

හිමගිර මට වැලි අහුරකි
මහ සමුදුර දිය රැල්ලකි
කටු අකුලෙන් මල් පුබුදමි
ඔබ සැනසේ නම්...

පිණි බිදකින් මුතු අමුණමි
දිනිසුරුගෙන් සීතල දෙමි
කඩුතුඩු මත සැතපෙන්නෙමි
ඔබ සැනසේ නම්...

පද රචනය - ප්‍රේමකීර්ති ද අල්විස්
තනු නිර්මාණය  - සරත් දසනායක

නුඹේ නමින් මා දුක් වී

නුඹේ නමින් මා දුක් වී ගොතනා කවිවැල්
නුඹට සොඳුරු ගීතයක් ය සලනා රසු දැල්
උදේ හවා කාන්සියට හෙළනා කඳුළැල්
නුඹට සිහිල් පැන් බිඳක් ය වඩනා මන ලොල්

මා හැරගිය දුකින් තැවී නුඹට සාප කරනු බැරී
නුඹේ නපුරු කමට කිපී හිතේ වයිර බඳිනු බැරී

නිදි නැති රෑ දෑස තෙමී මතක සුවඳ වැළඳ ගනී
මා තනිවුණු අයුරු පෙනී නුඹ සැනැහෙන් මට හිනැහී

පද රචනය - සුනිල් ආරියරත්න
සංගීතය - ඩබ්. ඩී. අමරදේව

සූරිය දෙනුවන්

සූරිය දෙනුවන් පුබුදින අළුයම
නිදිකුම්බා වැල නිදිගන්වා
පෙරදා අප දුටු සිහින නෙළන්නට
එන්න දේවිකා පියා සලා...

මිහිදුම් සළුවෙන් දෑස මුවා කොට
පිණි කඳුළැල් මඟ දිග රන්දා
සැමරුම් විජිතය සොයා ඉගිල යමු
එන්න දේවිකා සිනා සලා...

නිදිකුම්බා වැල දෑස හරින තුරු
අතීත හෙවණැළි ළඟට වෙලා
අපේම ආදර ලොවක හිනා වෙමු
හද ජීවිතයෙන් ඈත් වෙලා...

පද රචනය - මහින්ද අල්ගම
සංගීතය  - සරත් දසනායක

ඇයගේ ඇකයෙහි

ඇයගේ ඇකයෙහි ඔබ හිස රඳවා
සැණැහුනු මොහොතක ඔබේම දෙනෙතින්
මා ඔබ දු‍ටුවා, ඇයට නොවේ
ඔබට පමණි ඔබ ආදරේ...

වසන්ත දෙකොපුල්, නිදිවැරු තොල් මල්
දසැඟිලි තුඩු අග, පිබිදුණු රණහස
ඇයට ආදරේ ආදරේ මම
ඇයට ආදරේ ආදරේ...

ඇගේ සුරත ගෙණ, පිණි විල්ලුද මත
ඇයට ඇලුම් බව ඔබ පැවසූ පසු
පෙරළා ඔබ හට පෙම් කරනා බව
ඇය මුමුණන සඳ ඔබ සිත සුවපත් වේ
ඔබ සිත සුවපත් වේ…

ඇයට පමණි මම ආදරේ…
ඔබට පමණි ඔබ ආදරේ…
ඇයට පමණි මම ආදරේ…
ඔබට පමණි ඔබ ආදරේ...

පද රචනය -  බණ්ඩාර කේ විජේතුංග
සංගීතය හා ගායනය - වික්ටර් රත්නායක
සහාය ගායනය - පණ්ඩිත් ඩබ්.ඩී. අමරදේව

දෙදරු ලඳුනි මට නිදි නෑ

දෙදරු ලඳුනි මට නිදි නෑ
තරු පෑයූ ගිනි කතරේ
ඉඳි ගස් සෙවනේ
වැලි හුල‍ඟේ කාසි නොවේ
සිඹින්න බැරි දරු සුවඳයි පාවී එන්නේ...

උපන් බිමට දත නියවා
රන් කාසිය මිට මොළවා
සිත කකියන්නේ
උන්නත් පෙර අප නොකා නොබී
නවසි තැඹිලි ගස් සෙවනයි
දැන් සිහිවෙන්නේ...

සැනසෙන්නට නුඹගේ කියා
කටහඬවත් ඇහෙනවනම්
ඉහ ඉද්දරිනේ, දැක ගන්නටවත් නුඹයි කියා
හීනෙන් වත් පෙනෙනවනම්
ඇහැ පියවෙන්නේ...

පද රචනය - ලූෂන් බුලත්සිංහල
සංගීතය හා ගායනය - වික්ටර් රත්නායක

මල් ලියකම් රැඳි

මල් ලියකම් රැඳි පෙම් සිතුවම් ඇඳි
ආදර විජිනි පතින් කවුදෝ
සිහිල් පවන් සලනා
කියා ගන්න බැරි නුහුරු හැඟුම්
ඔබෙ නුවන් පුරා ඇඳෙනා...

ඔච්චම් කර මල් කුමර කුමරියෝ
අප වට කර හිනැහෙන්නා
කිඳුරු කොදෙව්වේ මුතු පායේ
හැංගෙමු අපි දෙන්නා...

රත්තරනින් සැදි කේතකි මං පෙත
අත්වැල් බැඳ යමු රත්තරනේ...
පිච්ච මලින් පිරී ලෝකය අපටයි
ස්වප්න පරාදීසේ සුරංගනාවියනේ...

පද රචනය - අජන්තා රණසිංහ
සංගීතය - සරත් දසනායක
චිත‍්‍රපටය - චූඩා මාණික්‍යය (1979)

නියපෙල සිඳලයි

නියපෙල සිඳලයි දෑත පාන්නේ
තුරුලට ගන්නට ආදරයෙන්
දැලි පත සිදලයි කොපුල පාන්නේ
මුව සිප ගන්නට ආදරයෙන්...

මව් නැති යාමේ මා උර මඩලේ
දෙතොල් හොවයි කිරි සුවද සොයා
දහඩිය සුවදක් දැනුනිද පුතුනේ
දෙරණට මුහුවන නුඹ වෙනුවෙන්...

නිදි නැති යාමේ මා ළය තුරුලේ
කැළුම් ගෙනෙයි මුදු සිනහ පපා
උණුසුම් සුසුමක් දැනුනිද පුතුනේ
පවනට මුහු වන නුඹ වෙනුවෙන්..

පද රචනය
සංගීතය - ජයන්ත රත්නායක

මගෙ හද ඔබ ළඟ

මගෙ හද ඔබ ළඟ ඔබෙ හද මා ළඟ
එනමුදු මගෙ අත වෙනතක බැඳ ඇත
දහසක් බැමි ඇත දහසක් ගිනි ඇත
එනමුදු නිවහල් ලොවකුත් ළඟ ඇත

විල්ලුද පලසින් රන්මිණි කැලුමින්
සැරසුණු සිරගෙය මා වටකොට ඇත
පිදුරු සෙවිලි කළ ඔබෙ පැල්පත වෙත
එන්නට මට කිසි අවසරයක් නැත

අතීතයේ රස මියුරු සැඳෑවන්
අද මගෙ හදවත අඬවන සුසුමෙකි
මිහිරියෙ අප හට ඉතිරිව ඇත්තේ
අපේ කල්පනා ලෝකය පමණකි

මේ සිරගෙය මැද දෙනෙත් පියාගෙන
සිරුරෙන් මියගොස් මා සිටිනා විට
ඔබේ සිඟිති මඳ සිනහ උපුල් මල්
මගේ සිහින ලොව දස අත සුපිපෙයි

යදම් පවුරු සහ සීමා අතරෙහි
මිරිකී කුමකට සිත රවටන්නෙද
දෑත දෙපා හා සිත ද මුදා හැර
මගේ ලොවට දිව එනු මැන සඳවති

පද රචනය - බණ්ඩාර කේ විජේතුංග
සංගීතය හා ගායනය - වික්ටර් රත්නායක

මනෝ මන්දීරේ

මනෝ මන්දීරේ
අපේ සෙනෙහස අතීතේ
මිය ඇදී ගිය අකාලේ
මිය ඇදී ගිය අකාලේ
මනෝ මන්දීරේ

සඳේ සුසුමයි සුව ගෙනාවේ
සැඳෑ මඳ අඳුරේ
හදේ පැතුමයි හුදකලාවේ
සදා රජ වූයේ
අරාජික මා
මනෝ මන්දීරේ

ඇසේ කඳුළයි හඬා කීවේ
නොකී ගොළු ගීතේ
අපේ උපතයි අපේ විපතයි
මෙසේ නිම වූයේ
අන්ධකාරේ
මනෝ මන්දීරේ

ගී පද - කුමාරදාස සපුතන්ත්‍රී
සංගීතය හා ගායනය - වික්ටර් රත්නායක

විකසිත තරු රෑනේ

විකසිත තරු රෑනේ
එපා මවන්නට ඉතින් ඇගේ රුව
මුකුලිත මල් ළඳුනේ
එපා අසන්නට ඉතින් ඇගේ වත
ඈ නැත මගේ ලොවේ

එකම සිතක් ලෙස සිත් දෙක හඳුනා
එකම පැතුම වී දෙසිතම පිපුණා
හෙටත් උදෑසන කුරුල්ලනේ තොප
ඈ මා එන මඟ බලා හිඳිනවද
ඈ නැත මගේ ලොවේ

අටවක පෝයට පන්සල වැඳලා
කන්දෙ විහාරේ දෙවියන් පුදලා
පහන් දල්වලා දෑතම සිපගෙන
දිවුරා කීවත් පලා නොයන වග
ඈ නැත මගේ ලොවේ

පද රචනය - උපාලි ධනවලවිතාන
සංගීතය - එච්. එම්. ජයවර්ධන

සඳත් ඉරත් නැති

සඳත් ඉරත් නැති - තරුත් වැසී ඇති
වනන්තරේ නැත තනියක්
ඔබත් මමත් ඇති - මටත් ඔබත් ඇති
මිනිස් පුරේ ඇයි තනියක්

ගලා ගලා යන ගඟේ පිරී දිය
ඇළේ දොළේ ඇසුරට වී
සිනා සිසී වන පෙතේ හිඳී
රස බිබී මුවන් තුඩ ඇතිරී..

සොබා දමේ දැඩි සිහිල් නිසංසල
සුවේ බිඳී ලොව සිතුසේ
ඔබේ මගේ පැල බෙදී බිඳී යන
සුළං කැරැල්ලේ දුකසේ..

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

ආශා නිරාශා මැවූ

ආශා නිරාශා මැවූ
ඈ ස්වප්න මායාවකී
ස්නේහේ ගඟුල් ප්‍රේමේ තැවුල්
මැවූ ඉන්ද්‍රජාලේ ඇයයි

දවාලන්න පෙම් මාරුතේ
ඇයයි ළංව ඉන්නේ සිතේ
නිවාලන්න දුක් ජීවිතේ
ඇයයි නිල්ල මල් මාවතේ
දිවා රැයේ මා ළඟයි
මගේ අරුම පෙම් අංගනා

නෙතේ හැංගි හැංගී හිඳී
සිතේ ස්වර්ණ යහනේ නිදී
මුවේ මන්දහාසේ දිදී
මගේ නින්ද ආයේ බිදී
දිවා රැයේ මා ළඟයි
මගේ අරුම පෙම් අංගනා

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

හිත ගාව දඟ කලා

හිත ගාව දඟ කලා
නෙතු ගාව හිනැහුනා
පැතුමකට ඉඟි කලා
හදක ආරාධනා...

සන්සුන් වු කල්පනා විජිතයේ පාවුනා
ඔබේ සෙනෙහස ගෙනා මිහිරි ආරාධනා
මල් පිපුණු තාරකා විමානේ තනි වුණා
හැඟුම් මන්මත් කලා සුසුම් ආරාධනා...

සිනිඳු මල් පෙති පුරා බඹර ගී ලියැවුනා
සිවු නෙතක් ළං කළා ඔබේ ආරාධනා
කුරුළු ගී පාවුනා නිල් ගුවන් ගැබ පුරා
වසත් කල ළං කළා සෙනෙහෙ ආරාධනා..

පද රචනය  - කුසුම් පීරිස්
සංගීතය හා ගායනය - වික්ටර් රත්නායක

ඔබේ දෙතොල් පෙති

ඔබේ දෙතොල් පෙති ලිහී පිපුණු හසරැල් විලේ
හද දියව ගලා යයී රැළි ලමින් සැලි සැලී
මෙවන් සුව පෙර නොවිදී තුන් සිතම සලිත වේ
සසර සැරිසරන තෙක් ඔබ මගේ ඔබ මගේ...

හිරු නිවී මුහුදු තෙර රාත්‍රිය එලඹිලා
තරු කඩා වැටෙන විට අහස් ගඟ කලඹලා
මට බලා ඉන්න බෑ ඔබෙ නුවන් පෙනෙනවා
සසර සැරි සරණ තෙක් ඔබ මගේ ඔබ මගේ...

නා ගසක් දළු දමා වසන්තය එලඹිලා
මඳ පවන් රැල් වැදී සැලෙන විට කැලඹිලා
මට බලා ඉන්න බෑ දෙතොල් ඔබෙ පෙනෙනවා
සසර සැරිසරන තෙක් ඔබ මගේ ඔබ මගේ...

යුග ගණන් පැමිණි මඟ පැටලිලා වැරදිලා
ඔබ මගෙන් වෙන්ව ගිය ලකුණු ඇති මාවතේ
මට බලා ඉන්න බෑ පෙර ඇසුර හැඟෙනවා
සසර සැරි සරණ තෙක් ඔබ මගේ ඔබ මගේ...

අහස් තල පොළෝ තල ඔබට මට පොදු වෙලා
හදවතින් එක් උනත් ගතින් දෙදෙනෙකු වෙලා
මට බලා ඉන්න බෑ සියොලඟම තැවෙනවා
සසර සැරි සරණ තෙක් ඔබ මගේ ඔබ මගේ.....

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

ඔබ නැතුව ඉන්න බැරි තරමට

ඔබ නැතුව ඉන්න බැරි තරමට
ඔබ හිතට ඇවිත් හෙමි හෙමිහිට
ඔබ නොදැක ඉන්න බැරි තරමට
නෙත ඔබව සොයනවා දවසෙම

මේ සීතල හිම ගිරි අරණේ
මට හමු වූ වනපස කුසුමේ
පෙති මත සතපා රැගෙන යන්න මා
කුසුම් නිම්නයේ මාලතියේ

මේ ජීවන අවපස අහසේ
ඔබ පුරපස සඳ වී පිපුණේ
ඔබේ රැසින් මා දවාලන්න රෑ
ළය මත සනහා රාජිනියේ

පද රචනය -  සුජීව ප්‍රසන්න ආරච්චි
සංගීතය හා ගායනය - වික්ටර් රත්නායක

සෝක සැනසුම් වේදනාවන්

සෝක සැනසුම් වේදනාවන් ආදරේ පුරවා ගෙනා
ඈගෙ නිලුපුල් දෑසෙ කඳුළැල් ජීවිතේ මතු වාසනා..

වීණාවෙ තත් මැද ගී ගයන්නේ පෑ සෙනෙහෙ හද මිහිර මවා
රන්කේලි බඳිමින් මඟ සරසන්නේ ජීවන ගමනේ පිහිට පතා..

මා සිහින විමානේ පැතුම් තටාගේ ආදර කුසුමන් පිපී තියේ
සැනසීම හෝ වැනසීම ඔබගේ ඔය නිල් දෑසේ රැඳී තියේ..

පද රචනය - මීගොඩ විල්සන්

තනු නිර්මාණය - මර්වින් පෙරේරා

පෙම්බර මධු මගේ

පෙම්බර මධු මගේ මා නැතේ ඔබෙන් මිදුනේ
සුරූපී දේහ විලාසේ මැවේ මැවේ නයනේ
පෙම්බර මධු මගේ

ලොවෙහි ඈත අනන්තේ පැලක් තුලේ නොපෙනී
ඇතත් හොරෙන් හැන්ගීලා මගේ දුකත් නොදනී
අරන් එමී ඔබ කැන්දා ඇසිල්ලකින් පැමිණී
සුරූපී දේහ විලාසේ මැවේ මැවේ නයනේ
පෙම්බර මධු මගේ

වඩාල දෝත පුරාලා පරවී කුමාරිය සේ
සුගන්ධ මල් යහනාවේ හොවා පෙමින් සිතුසේ
පවන් සලා ඔබ සනසා ලදැල්ලකින් සුවසේ
සුරූපී දේහ විලාසේ මැවේ මැවේ නයනේ
පෙම්බර මධු මගේ

අපේම පාලු විමානේ නිසංසලේ සහනේ
අමා පැනින් මත්වීලා ඔබේ දෙතොල් බඳුනේ
විදින්නේමී රස මදිරා පෙරුම් පිරූ ලෙසිනේ
සුරූපී දේහ විලාසේ මැවේ මැවේ නයනේ
පෙම්බර මධු මගේ

පද රචනය - කරුණාරත්න අබේසේකර
සංගීතය - පි.එල්.ඒ. සෝමපාල

මම තරහා නැහැ

මම තරහා නැහැ
ප්‍රේම පත්‍ර බොළඳ වචන කුළු ගැන්වූ ආදරයක්
සිටු මැදුරක විසූ ඔබට මගේ පැලේ ඉඩ මදි නම්
කුමාරයෙකු අත ගන්නට වේවි වාසනා...

හිතට දුකක් ඇති වෙනවා ඒ වුනාට නෑ කමක් නෑ
මම තරහා නැහැ

අමෘතයද ඉවත හෙලයි හිත නැති නම් මුව තැබුමට
ඉරණම එය විසඳනු ඇත මටත් කලක් උදාවේවි
රැහැන් වෙලා බැඳගන්නට බැහැනේ ආදරේ..

හිතට දුකක් ඇති වෙනවා ඒ වුනාට නෑ කමක් නෑ
මම තරහා නැහැ

පද රචනය හා සංගීතය - පුණ්‍යසිරි මහවත්ත

දුක කියන්නට කෙනෙක් නැති දා

දුක කියන්නට කෙනෙක් නැති දා
දුක ඇසූ නුඹ
අද මගේ
දුකට හිනැහෙන්නේ..

වියළි තතරට වැහි පොදක් ලෙස
කඩාගෙන වැටි නුඹේ සෙනෙහස
මහා මේඝයක් ලෙසින් හමා විත්
මට මාව නැති කලේ කොහොම ද..

හදවත ඇවිලුනු අතීත දුක් ගිණි
සුවපත් කළ පින නුඹට අයිති මුත්
ප්‍රේමය මියගිය නුඹ හද දෙවොලින්
හෙටක් පතන්නට හිතට වාරු නැත..

පද රචනය - ඩිෂාන් නානායක්කාර
සංගීතය - එච්. එම්. ජයවර්ධන

ඔබ වගේ කෙනෙක්

ඔබ වගේ කෙනෙක් තව ඇත්නම්
ඒ ඔබම තමයි මේ ලෝකේ
සඳ වගේ සඳක් තව ඇත්නම්
ඒ මගේ සඳයි සිත් අහසේ...

සරස සරස මම ඉන්නට ආසයි
සිරස සිරස සිප ගන්නට ආසයි...

ඔබ හිනාවකට සුදු මුතු මල් දම්
මේ ළයේ පහන් දැල්වෙන අන්දම්
ඔබ මගේ කියා මට හිතෙනව නම්
ඒතරම් සැපක් මට නෑ ආයේ...

සනස සනස සිත මම ඉන්නම්
සිහින සිහින මැද සරනව නම්...

රන් රූපෙන් ගලනා විට සඳකැන්
මේ රැයේ කොහොම ඉන්නද නොදනිම්
මා ඔබෙයි කියා ඔබ සිතනව නම්
මේ තරම් දුරස් වී ඇයි ඉන්නේ...

පැටළි පැටළි ඔබ ළඟ ඉන්නම්
නැළවි නැළවි ඔබ නළවන්නම්...

පද රචනය -  සුජීව ප්‍රසන්න ආරච්චි
සංගීතය හා ගායනය - වික්ටර් රත්නායක

දිනෙක හිරු බැස යන වෙලාවක

දිනෙක හිරු බැස යන වෙලාවක
සයුරු වෙරලක හුදෙකලාවක
කල්පනාවේ සිටින මොහොතක
මතක් විය සිතුවිලි අතීතෙක..

සයුර මා විය, අහස ඔබ විය
දෙදෙන ලංවූ සිතිජයක් විය
ඒ වෙලාවේ මට මතක් විය
කලක් ලොව අප ගැන සිතූ හැටි..

සයුර මා විය, අහස ඔබ විය
දෙනෙත රැවටූ සිතිජයක් විය
කී කතාවේ අරුත වැටහින
අහස සමුදුර එකතු වී යැයි..

පද රචනය - කේ.ඩී.කේ ධර්මවර්ධන
සංගීතය හා ගායනය - වික්ටර් රත්නායක

කඳුළු අකුරු පෙළ

කඳුළු අකුරු පෙළ සුසුම් මියැසි සර
පැරදුන ගීතය අසා පුරුදු සුළ‍‍ඟේ
අනේ ඇයි දිව යන්නේ
පැරදුන ගීතය අසා පුරුද් සුළ‍ඟේ...

තරණය නොකලැකි ඇගේ ඉසවුවේ
බැඳ ඇත ප්‍රාකාරේ
කඳ්‍රළින් ලීවෙමි සෝකී ගීතේ
විරහ වේදනාවේ..

ගවුවෙන් ගවුවට වෙන් වන්නට දෝ
අප මාළිග තැනුවේ
ගවුවක් ඈතින් ඔබ සිටියත් නෑ
මතක සිහින මැකුනේ..

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

චිත්‍රපටිය - වජිරා

අඹ ගස් යට මල් හැලිලා

අඹ ගස් යට මල් හැලිලා
සුවඳේ බැරුවා ඉඳින්ට
ඒ අඹ මල් සුවඳ දිගේ
වන බඹරෝ රොනට එන්න

මගෙ බඹරිය කැලේ දමා
එන්නට බෑ අඹ වනයට
මුසා බසින් මා නොතලා
එන්න සුවඳ මල් හෙවනට

බඹරු නැද්ද අඹ වනයේ
ඔබේ හිතට ගතට ඔබින
අන් බඹරුන් ඕනෑ නෑ 
ඔබයි මගේ පැතුම් විමන

පද රචනය - සුනිල් ආරියරත්න
සංගීතය හා ගායනය - වික්ටර් රත්නායක
යුග ගායනය - නිර්මලා රණතුංග

රූකඩ මඩු යාග පොලේ

රූකඩ මඩු යාග පොලේ කෝළ නුඹේ රුවට ළොලේ
ආල පිරූ මා ගැන දැන් නැද්ද නිනව්වක්...

ඈත ලන්ද දියමංකඩ ඔහොම පිපී තිබුණු මලට
ආලවන්ත බහක් දෙන්න ආ බඹරින්දු
මලට ළොලේ පිණි කඳුළේ
නිතර රැඳී උන් බඹරින්දු....

යාය පුරා මල් උතුරා කෝළ දැරිවි කුමරි වෙලා
මාල හතක වරම ගන්න දෑත වනන්නා
නිබඳ මගේ පිරුණු සෙනේ
නුඹ නොදනී මල්මද ලන්දු...

පද රචනය - වසන්ත කුමාර කොබවක
සංගීතය හා ගායනය - වික්ටර් රත්නායක

සිහින සතක් දුටුවෙමි මම

සිහින සතක් දුටුවෙමි මම සත් දවසක් එක විලසින්
එක සිහිනෙක ඔබ දුටුවා සිඟන්නියක සේ..

ඔබ මගේ පැල්පතට පැමිණ, ආයාචනයක් කරමින්
ජීවත් වන්නට කිසිවක් ඉල්ලා සිටියා..

කිසිවක් දෙන්නට මට නැත, තිබුනේ පිරිසිදු හදවත
සිඟන්නියේ එය ඔබ හට දුන්නා මතකයි..

එදා මගේ හද අරගත් ඔබ, අද මට වැඩි පොහොසත්
ඒ හින්දා මටත් එලෙස පිහිට වනු මැනේ..

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක

ආදරයේ උල්පත වූ අම්මා

ආදරයේ උල්පත වූ අම්මා, මා ඔබගේ පුතු වූ
‍ඔබ මතු බුදුවන දවසේ, මා රාහුල කුමරුන් සේ
සෙවන පතා අද මෙන් පැමිණෙන්නෙමි
සුළැගිල්ලේ එල්ලී...

සඳ දිය කොට කිරිවතුරෙන්, ඒ දියරෙන් මුව දෝවා
දිව මතුරක්වන් නැලැවිලි ගීයෙන්, මතකයි මා නැලැවූවා
ජීවිතයෙන් ජීවිතයක් ගෙන දී, ඒ ජීවිතයට කිරි දී පණ දී
මා දැඩි කල අම්මා...

තුරුලට ගෙන අත් පා හැඩ ගස්වා, නිදි ගන්වා යහන් ගැබේ
සිහිනෙන් ගෑ සුවඳක් මෙන්, සිහිවෙයි ඒ කිරි සුවඳ ඔබේ
දවසින් දවසට සෙනෙහස ලබැදී, ගෙන දී දිවියට නව පන ලැබදී
මා දැඩි කල අම්මා...

පද රචනය - ප්‍රේමකීර්ති ද අල්විස්
සංගීතය හා ගායනය - වික්ටර් රත්නායක