මෝහෙන් මුලා වෙලා

මෝහෙන් මුලා වෙලා
මානෙන් උදම් වෙලා
තණ්හාව ක්‍රෝධ ද්වේශ පාරේ
මිනිසා කොහේද මේ...

රත්තරන් කෙණ්ඩියේ සිංහ තෙල් වගේ 
මිනිස් ගුණේ සැමදා බැබලේ
එය රැකීම අප උරුමේ වේ....

කේළම් කීමෙන් ඕපදූපයෙන්
රට කොටවන වැඩ අවදානම්
උඩින් මිතුරු වී යටින් හතුරු වී
උගුල් අදින්නා යයි දිය වී
බොරුවෙන් රට පිරිහේවී...

මා හරි උගතා මා හරි ජගතා
සිතනා මිනිහා මෝඩයෙකී
අනුන් හෙලන්නට වලක් කපන්නා
ඒ තුළ වැටිලා මිය යන්නා
කළ දේ පල දේ එලෙසේ...

පද රචනය - සිරිල් ඒ සීලවිමල
තනු නිර්මාණය හා සංගීතය - ආර්.ඒ. චන්ද්‍රසේන

සංගීතවේදියෝ

දෝතට ගත්තේ දොළකින් බිඳුවකි
බර ඇති ගසකින් කැඩුවේ ගෙඩියකි
ලැබෙන දෙයක් ඇඳ සතුටු වුනා ලොව

සංගීතවේදියෝ...
සංගීතවේදියෝ...

සොබාදහම හා අවිදි වුනා මිස
කුරුළු ගීතයට කන් දුන්නා මිස
අවිහින්සක කම රජ කෙරුවා මිස
මානව භක්තිය ගැන සිතුවා මිස
ඒ පවසින් කිසි දින මුර ගා නැත

සංගීතවේදියෝ...
සංගීතවේදියෝ...

රජ සභා මැද පුද ලැබුවා මිස
දෙවියන්ගෙන් බුහුමන් ලැබුවා මිස
පතුරාගන්නට සිය කිතු ගොස යස
කවියට ගීයට කවමින් වස විස
අවි ගෙන කිසි දින සටන් වැදී නැත

සංගීතවේදියෝ...
සංගීතවේදියෝ...

පද රචනය -
තනු නිර්මාණය -

ප්‍රේම පරාදීසේ

ප්‍රේම පරාදීසේ

සිනහ බිඳුව ඔබ

කඳුළු බිඳුව ඔබ 

ප්‍රේම පරාදීසේ...

විකල් මතක මැද පහන් තරුව ඔබ

බොඳවුණු සිහිනෙක අරුණෝදය ඔබ

වැළපුන වෙරළක දිය බිඳුව ඔබ

ගොළුවුණු දෙතොලක සිනහ සිහිල ඔබ...

ගිණි දන කතරක පවන් රළකි ඔබ

විළි ලන අඳුරක නැවුම් ඉරකි ඔබ

නොහැ‍ඟෙන නොලැබෙන නොවිඳි සුවකි ඔබ

වියරුව ඈ මෙන් නො එන දුකකි ඔබ...

පද රචනය - ප්‍රේමකීර්ති ද අල්විස්

තනු නිර්මාණය හා ගායනය - වික්ටර් රත්නායක

ආදර පූජාසනේ

ආදර පූජාසනේ
ඔබයි මගේ කුසුම් කුමාරී
ආදර පූජාසනේ
මමයි ඔබේ කුසුම් මනාලී...

ආසිරි පවන් රොදින් ඇසේ 
දේව දූතයන්ගෙ මිහිරි ‍ප්‍රේම ගීතිකා
සාදර පැතුම් පවන් වැදී
දේව දූතයන් ගයාවි ප්‍රේම ගීතිකා…

යෞවන මල් සමයේ මේ නිසසල යාමේ
සීතල රෑ... සැතපෙම් මා... මංගල මල් යහනේ…
මංගල සීනු හඬින් චංචල වූ ලෝකේ
අනුරාග... පෙම් රාව...නින්නනාදයෙ…

ඔබගේ නුරා සුසුමේ රන් මුතු ලැල් පවනේ 
සිලිලාරේ... වෙලෙමී මා... පෙම්සිත් අනුරාගී
විකසිත නෙත් සඟලේ ප්‍රේම ශිඛා කැල්මේ 
ආලෝකේ... සැතපෙන්න... ළංවෙන්නෙ මා…

පද රචනය - ධර්මසිරි ගමගේ
සංගීතය - එම්.කේ. රොක්සාමි
සහාය ගායනය - සුජාතා අත්තනායක
චිත්‍රපට‍ය - දෙවියනි ඔබ කොහිද

අපි ඈතට ඈතට පා නගලා

අපි ඈතට ඈතට පා නගලා
ඝන වනන්තරේ
අතරමං වෙමු
වසන්ත මල් ගොමුවේ...

කාත් කවුරුවත් නෑ එන්නේ
ඉඳුල් නොවේ රුදු මිනිස් ඇසින්
අපේම පුංචි ලෝකයේ අපි ඉන්නේ
බඹරුන් විතරයි තනියට ළඟ ඉන්නේ...

කෙසේද අත් බැඳ ඇවිදින්නේ
වෙරළේ උයනේ තුරුළු වෙමින්
නෑසිය මිතුරන් මඟතොට හමුවන්නේ
උකුසු ඇසින් අප කෙලෙසද ගැලවෙන්නේ...

පද රචනය - සුනිල් ආරියරත්න

සංගීතය හා ගායනය - වික්ටර් රත්නායක

අඳුර බිඳින්නට

අඳුර බිඳින්නට රැයක් දවාලු
ලන්තෑරුම් නිවලා
තිමිරයෙ තිරකඩ අරුණෙහි බිඳ හැර
හිරු තව දවසක් ගෙනැවිල්ලා...

මතකය නම් වූ මළ පොත පෙරලා
මළගිය ඊයේ සිහිපත් කළ මැන
පැතූ පැතුම් අත් මිට මොළවාගත්
දෑතෙහි දසැඟිලි දිග හැරලනු මැන
එහි මොනවද ඇත්තේ...
කිසිත් නැත
හිස් බවෙකිය ඇත්තේ...

සමුදුරු ගිරිහෙල් දෙරණ තලා මැද
යෞවන විය පියවර තබනා සඳ
හිස්වන පද විත සපුරා ගන්නට
මියැසි විරාමය යළි පැමිණී ඇත
අරුමෙකි පැවසෙන්නේ...
එපමනයි
පිළිසරණය වන්නේ...

පද රචනය - ප්‍රේමකීර්ති ද අල්විස්
තනු නිර්මාණය හා ගායනය - වික්ටර් රත්නායක
චිත්‍රපටය - මාතර ආච්චී

අරුණ උදයේ

අරුණ උදයේ ඇය පිටත් වේ ගෙදර සිය සැමියා තබා
ඔහු මවක් සේ කිරි පොවා දී රැක ගනී නලවයි බබා...

ඈත ඇය යන දුම්රියේ හඬ වදින්නේ හදටයි තදින්
එය මැකෙන්නට ගුවන් විදුලිය කරකවයි ඔහු මහ නදින්
පියා මව වී මව පියා වී දකින දරු කැක්කුම තුලින්
කවුරුවත් නැති ජෝඩුවක් දැයි බලයි ගම විමසිලි නෙතින්...

නම්බු ගෞරව තත්ත්ව පදනම් නොම වටී ආලය තරම්
දෙගුරු ගුරුවරු අපිට කුමට ද පැලක ඉමු අපි රත්තරන්
ඉතින් රැකියාවක් ද හරි හැටි නොමැති ඔහුගේ අත අරන්
කොළඹ යයි ඇය ඔහු හිඳී ගෙයි ගෙයයි දරුවයි මුර කරන්...

පද රචනය - ප්‍රේමකීර්ති ද අල්විස්